Првата средба меѓу руската и украинската делегација од март 2022 година заврши во Истанбул во петокот по околу еден час и 40 минути разговори, изјави извор од турското Министерство за надворешни работи, а украински извор рече дека Русија поставила нови, неприфатливи барања.
Средбата е завршена, рече функционерот.
На разговорите присуствувал и турскиот министер за надворешни работи Хакан Фидан, се наведува во извештајот од неговата канцеларија.
Руско Украински преговори Истанбул EPA-EFE/
Содржината на разговорот не беше откриена, но украински функционер ја обвини Русија дека има „неприфатливи“ територијални претензии за да ги поткопа преговорите.
„Руските барања се одвоени од реалноста и одат многу подалеку од сè што беше претходно дискутирано. Тие вклучуваат ултиматуми за Украина да се повлече од својата територија за прекин на огнот и други неконструктивни услови“, изјави изворот за Ројтерс под услов да остане анонимен, опишувајќи ги разговорите меѓу претставниците на двете земји во Истанбул.
„Украина е подготвена за вистински прекин на огнот и понатамошен вистински мировен процес без никакви предуслови“.
Украинската делегација, предводена од министерот за одбрана Рустем Умеров, требаше да преговара за директна средба меѓу украинскиот претседател Володимир Зеленски и неговиот руски колега Владимир Путин, изјави украински дипломатски извор за АФП.
На отворањето на разговорите, Турција повика на прекин на огнот „што е можно поскоро“ во Украина.
„Секој ден одложување води кон дополнителни човечки загуби“, рече турскиот министер за надворешни работи Хакан Фидан.
За турскиот министер беше „многу важно“ овие разговори да „формираат основа“ за средбата меѓу рускиот и украинскиот претседател.
Кремљ во петокот одговори дека средбата меѓу рускиот претседател Владимир Путин и американскиот претседател Доналд Трамп е клучна, но дека за неа се потребни значителни подготовки и дека тие мора да дадат резултати.
Турскиот министер за надворешни работи Хакан Фидан веќе се сретна со советникот на претседателот Владимир Путин, Владимир Медински, во четвртокот вечерта, а турскиот претседател Реџеп Таип Ердоган и украинскиот претседател Володимир Зеленски, исто така, имаа долг разговор.
Портпаролот на Кремљ, Дмитриј Песков, во петокот изјави дека средбата меѓу рускиот и американскиот претседател Владимир Путин и Доналд Трамп е несомнено неопходна, но дека мора темелно да се подготви, објави Анадолија.
Зборувајќи на прес-конференција во Москва, Песков рече дека билатералните односи, меѓународните прашања и украинската криза треба да бидат главни теми на средбата меѓу Путин и Трамп.
„Таква средба е несомнено потребна од гледна точка на билатералните руско-американски односи и од гледна точка на дискусија и сериозна дискусија на највисоко ниво за меѓународните работи и регионалните прашања, вклучително, секако, кризата околу Украина“, рече тој.
На прашањето за мировните преговори меѓу руската и украинската делегација во Истанбул, Песков рече дека Путин ги добива сите информации за тоа дури и во реално време.