Еврокомесарот Јоханес Хан во интервју објавено на сајтот на Европската комисија, по средбите со политичките лидери во земјава, вели важно е да се почитува Уставот, во кој е запишано дека е потребно мнозинство за формирање влада.
– Победник може да биде партијата која не е број еден, победник може да биде партија или партии кои освоиле најмногу места во Парламентот, значи постојат различни дефиниции. Уште еднаш, она што е релевантвно на крајот е која формација може да обезбеди мнозинство, веродостојно мнозинство во Парламентот, бидејќи по сите овие години на внатрешни разговори и фокусирања на политичките прашања, мислам дека е важно да се води грижа за евроатлантската перспектива, да се одговори на економските предизвици и безбедносните прашања. На државата и треба стабилна влада и влада која е посветена на реформската агенда што народот го очекува и се надевам дека ова конечно ќе биде исполнето, вели Хан.
Еврокомесарот дополнува дека Парламентот е местото каде што се одлучува и каде треба да се води дебата, и ЕУ очекува што поскоро внатре да се одвиваат конструктивни разговори а не попречувања.
На прашањето дали го поддржува Иванов, кој нема намера да го даде мандатот додека СДСМ не се откаже од платформата на Албанците, Хан вели во интерес на земјата е секој фактор кој има своја улога, треба да биде свесен за неговите одговорности и обврски, да го почитува Уставот и доколку има предлог, ако има владина програма која е базрана и го почитува Уставот, тогаш тој мора да се согласи и да го поддржи формирањето на таа влада.
Јоханес Хан смета дека решението на кризата е да се почитуваат демократските правила и стандарди кои се напишани во Уставот, односно кога има мнозинство за Влада од кого и да е, тоа мора сите да го почитуваат.
Исто така, еврокомесарот потенцира дека ја почитува функцијата на Ѓорѓе Иванов како претседател, но дека треба да биде во државава и како активен чинител да донесе одлуки за надминување на политичката ситуација.
– Мислам дека тој е надвор од државата, во државна посета и јас ја почитувам Канцеларијата на Претседателот во една демократска земја и не сакам да го коменирам ова. Но претпоставувам дека во вакво време, веројатно е многу важно да се биде во земјата и да се грижи. Посебно што улогата на претседателот е одлучувачка и сите очекуваат тој да учествува и да има проактивна улога, да придонесе за мирно решение на тековните преговори, одговара Хан.
Тој порачува дека важно е почитувањето на различните етникуми во оваа земј, да се живее заедно на мирен начин, што подразбира меѓусебно почитување.
– Разбирливо е различни делови од општествоото да имаат различни гледишта, но она што го слушнав од разговорите е дека сите се посветени на почитување на Уставот и тоа е важно, сите да го следат Уставот. Но она што е важно за мене е владината програма, тоа е одлучувачко и нешто за што политичките партии и претставници треба да преговараат, вели Хан.