СДСМ и коалиционите партнери вечерва во Скопје го одржаа централниот митинг пред локалните избори што ќе се одржат следната недела. На митингот пред зградата на Владата, беа претставени сите кандидати за градоначалници, а од бината се обратија само кандидатот за Скопје, Петре Шилегов, и лидерот на СДСМ и премиер, Зоран Заев.
Заев на граѓаните им вети дека нема да ја изневери довербата на граѓаните и ја побара нивната поддршка на изборите за заедно со идните градоначалници да изградат услужни и развиени општини.
„Во кои луѓето ќе живеат и работат квалитетно еден покрај друг, во општини и градови кои ќе работат за граѓаните“, рече Заев.
Тој нагласи дека како што почнала новата Влада да работи домаќински, така и ќе продолжи и во иднина. Ќе останат посветени и ќе докажат дека во Македонија може да има реална промена.
Кандидатите за градоначалници на коалицијата, предводена од СДСМ, како што порача Заев акцент ќе стават на тоа граѓаните во општините да одлучуваат за тоа како ќе се трошат парите, на чистата животна средина, која подразбира чист воздух и чиста вода за пиење.
На централниот митинг во Скопје Заев вети дека Владата ќе ги помага градоначалниците и советите да пуштат повеќе пари кај граѓаните, да создаваат повеќе можности за работа за младите, како и да нудат услови за поквалитетно образование и здравство во нивните села и градови.
Како симбол на новото време најави дека „тенкот“ на Никола Груевски, односно владиниот мерцедес од 600 илјади евра ќе биде продаден и со парите од неговата сегашна вредност ќе се купат амбулантни возила.
Тој изрази верување дека Македонија ќе биде 30. членка на НАТО.
„Денеска ја барам поддршката заедно да ја ослободиме Македонија од остатоците од режимот, да дојде подобар живот во секое село, секој град. Се здруживме со граѓанските организации и со 22 политички партии и од вас бараме поддршка да изградиме слободни, услужни и развиени општини, кои ќе работат и ќе ги поврзуваат граѓаните и кои ќе ги враќаат парите, назад кон граѓаните“, рече Заев.
Кандидатот за градоначалник на Град Скопје од СДСМ, Петре Шилегов, порача дека Скопје веќе не е вмровски град и ги повика сите заедно да го зададат последниот удар на режимот на, како то рече, бандата на Никола Груевски.
„Скопје го враќаме на граѓаните. Нема партиски поделби, нема етнички поделби. Изминативе денови поминав многу скопски општини, сите ме пречекаа и испратија со истата порака, да се обединиме за на Скопје да му ја донесеме слободата. Цела деценија сме жртви на урбаното и коруптивното владеење на ДПМНЕ. Груевски преку Коце Трајановски правеше буквално што сака со нашиот град“ – рече Шилегов.
Тој вети дека во 2018 година ќе ја започне гасификацијата на Скопје, кој ќе биде отворен и услужен град.
„Вашите идеи ќе бидат моја обврска. Скопје за време на мојот мандат ќе биде град што поврзува луѓе. Ќе ги поврземе Аеродром и Кисела Вода преку пруга. Скопје ќе стане вистински мултиетнички град. Нема веќе поделби“- порача кандидатот за градоначалник на Град Скопје од СДСМ.
Шилегов вети дека плански ќе гради улици и булевари за да го намали сообраќајниот метеж, ќе купи нови електрични автобуси за да ги замени кинеските (кои ги нарече најголеми загадувачи), а на скопјани ќе им овозможи да засадат по едно дрво за секое новороденче што ќе се роди во градот.
На митингот се обратија и граѓанските активисти Никола Писарев и Руше Рауфи Адеми.