Пред американската амбасада во Бејрут, се насобраа демонстранти кои протестираат против одлуката на американскиот претседател да го признае Ерусалим за главен град на Израел.
Конфликтот започнал кога демонстрантите се обиделе да влезат во зградата на амбасадата, а безбедносните сили употребиле солзавец за да ги растераат.
Засега нема информации за повредени, а снимките покажуваат дека демонстрантите фрлаат со камења кон амбасадата.
По одлуката на Трамп да го признае Ерусалим за главен град на Израелската држава, избувнаа насилни протести и конфликти. Во нив, едно лице беше убиено, а стотици се повредени.
Стотици Палестинци и нивни поддржувачи протестираа вчера во Рим, а група маскирани напаѓачи вчера навечер со молотови коктели ја нападнале синагогата во Гетеборг, Шведска.
Министрите за надворешни работи на арапските земји одржаа состанок во Каиро на кој од САД побараа укинување на одлуката на претседателот Доналд Трамп.
Тие оценија дека признавањето на Ерусалим за главен град на Израел ќе има сериозни последици врз развојот на настаните бидејќи го става Вашингтон на страната на окупаторот и го крши меѓународното право.