Бугарија се надева дека во април или мај Европската комисија (ЕК) ќе предложи отворање на преговорите за членство со Македонија, изјави денес во Брисел Димитар Цанчев, амбасадорот на Бугарија во ЕУ.
Тоа, според европските дипломати, значи дека дури во април ќе се ослободиме од условената препорака за членство што ја добивме пред повеќе од две години поради застој на патот кон ЕУ за време на претходната влада.
Но, пропаѓаат надежите на нашата влада дека ќе добиеме чиста, безусловна препорака во февруари кога ЕК ќе излезе со својата стратегија за Балканот.
Од европски извори НОВА дознава дека зад ова стои и спориот реформски напредок на Македонија. Во Брисел со незадоволство се гледа на долгиот одмор на Собранието од кое се очекува барем усвојување на итни но и квалитетни закони од областа на разузнавањето и законот за заштитени сведоци според препораките на експертската комисија на Прибе.
“Дури и да биде решен проблемот со името во наредните месеци, Македонија ќе се исправи пред голем проблем доколку не бидат направени итните реформи од препораките на Прибе. Земјите членки ионака се многу колебливи кога станува збор за зачленување на земјите од Балканот па ако нема реформи ќе пропадне надежта за брзо отворање преговори за членство”, предупредува еден европски дипломат.
Амбасадорот Цанчев ова и го потврди велејќи дека “сите држави од Западниот Балкан треба да ги исполнат критериумите а некои земји членки се особено чувствителни по тоа прашање”.
Според Цанчев, македонските власти покажуваат дека сакаат напредок со Грција и добро е што е постигнат договорот за доброседство во Бугарија:
“Но покрај односите со соседите треба напори на владата за продолжување на реформите. Треба да се направат тешки и сложени реформи. Вие сте на тој пат. Ние сме го поминале и сакаме да помогнеме. Конечно, сето треба да им биде претставено на нашите партнери во ЕУ за да ги убедиме дека Македонија ги исполнува барањата и може да одговори и да го направи чекорот кон почеток на преговорите. За тоа се важни и преговорите со Грција и нам ни дава надеж интензивната работа што постои меѓу двете влади и се надеваме ќе даде резултат”, вели Цанчев за НОВА.
Според нашите извори колебливите земји членки се Франција, Холандија, Белгија, Луксембург и Данска.
Тој со оптимизам додава:
“Она што треба да се направи може да се види во извештајот на ЕК од декември 2015 година. Новата влада што конечно дојде на власт има јасна волја да се продолжи по патот кон ЕУ”, вели тој.
Според Цанчев, Бугарија не може да го избегне користењето на привремената референца кога ќе зборува за нашата земја во наредните шест месеци во рамките на бугарското претседателство со ЕУ.
“Бугарија ја призна Македонија под уставното име но поради ЕУ ќе го користиме називот ПЈРМ”, изјави денес тој во Брисел.