Вкупно 26 прислушувани разговори, од кои 10 познати во јавноста и 16 необјавени треба да се слушнат на денешното рочиште за предметот „ТНТ“ на СЈО, за уривањето на комплексот Космос на бизнисменот Фијат Цаноски. Дел од доказниот материјал се и СМС пораки меѓу обвинетите преку кои се договарале за уривањето.
Во овој случај обвинети се седум лица, меѓу кои поранешниот премиер Никола Груевски, екс министерот за транспорт и врски, Миле Јанакиески и екс градоначалникот на општина Гази Баба, Тони Трајковски.
Според обвинението, тие во 2011 година за политичка одмазда го урнале објектот на нивниот политички противник, Цаноски, кој е во коалиција со сега веќе владејачкото мнозинство. Според СЈО, со уривањето е предизвикана штета од 16 милиони евра, а буџетот на општина Гази Баба е оштетен за дополнителни три милиони денари.
Бомбите требаше да се слушаат на минатото рочиште на 16 март, но одбраната побара да биде одложено бидејќи, како што наведоа се подготвувале за изведување нови докази, а не за слушање.
Најгласен во судницата беше Груевски кој прво реагираше на тоа што судијата најави дека ќе се работи цел ден, а потоа и затоа што ќе се слушаат прислушуваните разговори, вкупно 26, меѓу кои, според бројката има и досега необјавени аудио-снимки.