Најмоќниот фудбалски работник на просторите на поранешна Југославија, Здравко Мамиќ е осуден на 6,5 години затвор за присвојување на 15,5 милиони евра од продажба на играчи на Динамо Загреб и за оштетување на хрватската државна каса за 1,6 милиони евра по основ на затајување на данок. За виновни во случајот се прогласени и тројца соработници – неговиот брат Зоран доби затворска казна на четири години и 11 месеци, Милан Пернар е осуден на четири години и два месеца, а Дамир Врбановиќ на три години.
Покрај затворските казни, како што пренесува хрватскиот портал „Индекс“, браќата Мамиќ ќе останат без автомобили од марката „бентли“ и „ауди“, две шуми, гаража, неколку станови, брод и ќе бидат блокирани нивните банкарски сметки. Но, постапка по заплена на имотот ќе следува по правосилност на судската пресуда.
Одлуката на Жупанискиот суд во Осиек, Здравко Мамиќ ја дочека во Томиславград, соседна БиХ, чие државјанство поседува. Во меѓувреме е издадена потерница по него и одреден му е истражен затвор со оглед дека изречената затворска казна е подолга од пет години.
„Мојот одговор ќе биде оружје што досега не е забележано на овие простори. Тоа не е оружје со кое се пука туку цивилизирано оружје. Не би сакал да сум во кожа на луѓето кои го „спакуваа“ сето ова и на крајот пресудија. Лично ќе се погрижам за моја одбрана, за одбрана и на моето семејство и на Динамо, за тие луѓе да спијат немирно и на крајот да завршат во затвор. Тие монструми кои така дрско осудија невин човек од денеска нема да спијат мирно“, порача Здравко Мамиќ на вонредната прес-конеференција во Меѓугорје.
Во случајот „Мамиќ“ е утврдено дека Динамо Загреб противправно ги премирал Лука Модриќ и Дејан Ловрен при нивните трансфери во Тотенхем, односно, Олимпик Лион со 50 отсто плус од вкупната вредност на договорите за сегашните ѕвезди на Реал Мадрид и на Ливерпул подоцна да морале да ги вратат парите кај Здравко Мамиќ.
Судскиот процес против хрватскиот фудбалски магнат почна на 27 април во 2017 година. Случајот го доби Жупанискиот суд во Осиек поради можно влијание на обвинетите во Жупанискиот суд во Загреб. Делото е опишано на 15.000 страници, во текот на истрагата се сослушани 97 сведоци, а УСКОК (Уред за сузбивање на корупција и организиран криминал) за предметот предложи дури 2,388 докази.
Хрватската полиција издаде налог за апсење на Здравко Мамиќ. Доколку се утврди дека до него не може да стигне, ќе биде распишана и меѓународна потерница.