Елина Свитолина е на чекор до пласман во полуфинале на завршниот ВТА Мастерс во Сингапур. По триумофт над Петра Квитова во првото коло, таа денеска, во рамки на т.н. Бела група, беше подобра и од Каролина Плишкова со 6:3, 2:6, 6:3 по два часа и 19 минути игра.
Во игра за полуфинале се врати и Каролина Возњацки. Пораз на стартот од Плишкова, бранителката на титулата го анулира со денешниот триумф на Петра Квитова со 7:5, 3:6, 6:2. Па, ситуацијата на табелата во групата е следна.
Квитова е единствена без шанси за полуфинале по двата пораза, а евентуални победи на Возњацки и на Плишкова во мечевите од третото коло ќе значи формирање на круг од три тенисерки со идентичен скор пришто најпрво ќе се гледа најголем процент на освоени сетови, потоа најголем процент на освоени гемови, итн.
Завршниот турнир на осумте најдобри тенисерки во сезоната се игра за награден фонд од седум милиони долари.
За утре се закажани натпреварите од второто коло во т.н. „Црвена група“. Слоун Стивенс ќе игра со Кики Бертенс, а Анжелика Кербер со Наоми Осака.