Кривичниот совет на Основниот суд утврди дека не се исполнети условите за екстрадиција на Томор Морина во Србија .
„Постапувајќи по барање на Министерството за правда на РСМ, а по разгледување на целокупната пропратна документација во барањето, како и ценејќи ја досегашната воспоставена судска пракса и меѓународното право, донесе решение дека не се исполнети условите за екстрадиција на лицето во Р. Србија како баратели на екстрадицијата“ соопштија од Судот.
Решението, заедно со предметот, согласно член 65 ст. 5 од Законот за меѓународна соработка во кривична материја, веднаш ќе бидат доставени до Врховниот суд на РСМ за понатамошно одлучување.
Воедно, мерката притвор против лицето, определена по предлог на обвинителството продолжува да опстојува до правосилноста на решението од Кривичниот совет, односно до одлучување по предметот од страна на на Врховниот суд на РСМ.
Косовскиот амбасадор во Северна Македонија, Ѓерѓ Дедај, вчера во КПУ Затвор-Скопје го посети поранешниот член на Ослободителната војска на Косово (ОВК), Томор Морина.
По средбата со Морина Дедај на својот Фејсбук напиша дека Морина „се чувствува целосно невин, достоинствен и оптимист, чекајќи ослободување бидејќи правдата е на негова страна и очекуваме дека многу скоро ќе се врати со неговото семејство и во Косово“.
Морина беше приведен на 25 јули годинава на граничниот премин Блаце по потреница издадена од Интрепол. Српските власти бараат Морина да биде екстрадиран во Србија, а властите во Приштина, пак, да биде ослободен и вратен на Косово.
Стефановиќ: Северна Македонија ќе го прекрши меѓународното право ако не го екстрадира Морина