Сноп позитивни реакции од високи претставници на Европската Унија (ЕУ), но и од министри на земји-членки за изгласаните Закони за Јавно Обвинителство и за Советот на јавни обвинители по кои македонското Собрание се самораспушти. Меѓу првите се јави Комесарот на ЕУ за надворешна политика и безбедност, Жосеп Борел кој изрази задоволство од донесување на Законот за јавно обвинителство во Северна Македонија.
Борел: Законот за ЈО е важен чекор за реформските процеси во Северна Македонија
Борел истакна дека веста за усвојување на Законот за ЈО ја дознал лично од министерот за надворешни работи Никола Димитров додека летале заедно од Минхен кон Брисел.
„Законот е уште еден важен чекор за имплементација на реформите и покажува дека Северна Македонија има волја да направи се што е потребно за земјата да има европска перспектива“, посочи Борел.
Тој додаде дека уште денеска ќе се разговара за Европскиот совет да ја отвори вратата за европска перспектива на регионот. Борел синоќа во Брисел учествуваше и на неформалната вечера со лидерите од Западен Балкан во организација на претседателот на Европскиот совет, Шарл Мишел.
Рот: Донесен Законот за ЈО, сега е ред на ЕУ да испорача
Сега е на ЕУ, конечно, да испорача, откако Северна Македонија го усвои Законот за Јавно обвинителство, напиша на Твитер германскиот министер за европски прашања, Михаел Рот.
„Добри вести од нашите пријатели од Северна Македонија. Парламентот штотуку го усвои двотретинскиот Закон за Јавното обвинителство. Натамошен чекор кон владеење на правото и европската иднина на Северна Македонија. Сега е на ЕУ, конечно, да испорача, напиша Рот на својот Твитер налог.
Фон дер Лајен: Се надеваме дека С. Македонија и Албанија ќе почнат преговори пред Самитот на ЕУ во Загреб
Пред неформалната вечер со лидерите од Западен Балкан, претседателката на Европската комисија Урсула фон дер Лајан истакна дека Западен Балкан е поблиску до Европска Унија.
„Знаете дека Западен Балкан е приоритет за ЕК и мислам дека е во заеднички геостратешки интерес да се приближи регионот кон ЕУ“, посочи Фон дер Лајен.
Таа додаде дека нова методологија треба да ја обнови довербата помеѓу сите страни и да ги забрза структурните реформи.
„Од друга страна создаваме одлична перспектива за земјите од Западен Балкан со тек на време земјите да станат членки на ЕУ. Исто така сакаме да го отвориме патот за Северна Македонија и Албанија да започнат со преговори ако е можно и пред самитот на ЕУ во Загреб. За самиот Самит подготвуваме пакет за инвестирање и искрено се надевам дека СЕ ќе даде зелено светло“, посочи Фон дер Лајен.