Аранжманите за 8 март во Италија се откажани поради новонастанатата ситуација со коронавирусот, а поради паника и страв се забележани обиди за откажување на аранжмани и за другите региони, велат од Стопанската комора за туризам на Македонија (СКТМ).
Оттаму посочуваат дека туристичките компании веќе трпат штети и оти во моментот не е потребна паника, туку конкретни акции што треба да се преземат. Реагираат бидејќи немаат конкретни насоки од ресорните министерства како треба да постапуваат во вакви ситуации. Бараат од Министерството за транспорт и врски, заедно со авиокомпанијата „Визер“, да заземат став за пролонгирање или рефундирање на уплатените средства за авионски карти за Италија со цел да се обештетат патниците.
Во понеделникот дописи се испратени и до Министерствата за здравство и за надворешни работи, но, како што посочија на денешната прес-конференција, од МНР ги исконтактирале вчера, а сè уште немаат одговор од Министерството за здравство.
„Понудите за региони зафатени со вирусот се повлечени, но имаме откажувања и за другите региони кои не се зафатени. Стравот и паниката се преголеми кај патниците, но и компаниите се во слична ситуација. Затоа вчера испративме допис и до Министерството за економија од каде побаравме да излезат со став за менаџирање во ваква кризна ситуација во услови на виша сила. До овој момент немаме одговор“, истакна Билјана Пејовска – Ристовска, извршна директорка на Комората.
Од Комората велат дека Рим не сака да ги врати веќе уплатените средства за хотелско сместување и ако се враќаат средства, тогаш тоа ќе треба да го направат агенциите на своја рака.
„Само за северна Италија имаме поврат на средства. Бараме барем „Визер“ да ни излезе во пресрет, бидејќи зема субвенции од државата. Двете опции се на маса“, нагласи новиот претседател на Комората, Емил Димитровски.
Според него, паниката ќе биде доведена до ниво да бидат откажани голем дел од аранжманите со што ќе се направи штета и на патниците и на агенциите. Во случај на откажување на аранжман за патување во другите региони, тогаш ќе бидат применети општите услови за патување.