Земјите од Западен Балкан со заеднички апел до Давид Сасоли, претседател на Европскиот парламент, и Урсула фон дер Лајен, претседателка на Европската комисија, да бидат изземени од одлуката за извоз на медицинска опрема од Европската Унија со цел да останат заеднички континентален одговор во соочувањето на пандемијата на коронавирус.
„Свесни за сложеноста на моментот во кој се наоѓаме и проблемите со кои се соочуваме како последица на пандемијата на Ковид-19, сакаме заеднички да укажеме на многу неповолната и предизвикувачка ситуација во која е регионот на Западен Балкан, како во поглед на бројот на заразени лица, така и во поглед на недоволната опременост на здравствениот систем со адекватна медицинска опрема и апарати што се неопходни за успешна превенција, лечење и спречување на натамошно ширење на коронавирус. Затоа, повеќе од кога било, ни треба солидарност, координиран пристап и заедничко делување“, е наведено во заедничкиот документ до Сасоли и Фон дер Лајен.
Потписници на апелот се Талат Џафери, претседател на Собранието на Македонија, Маја Гојковиќ, претседателка на Собранието на Србија, Иван Брајовиќ, претседател на Собранието на Црна Гора, Вјоса Османи, претседателка на Собранието на Косово, Грамоз Ручи, претседател на Собранието на Албанија, Драган Човиќ, претседателот со Домот на народите во Парламентарното собрание на БиХ и Денис Звиздиќ, претседавач со Претставничкиот дом на Парламентарното собрание на БиХ.
„Апелираме да ја разгледате можноста за вклучување на регионот на Западен Балкан во ЕУ+ шемата за дозволи за извоз, да овозможите на регионот на Западен Балкан да пристапи кон Договорот за заеднички набавки на медицински противмерки и на тој начин да учествува во заедничките јавни набавки на медицинска и заштитна опрема во борбата против коронавирусот, да ја разгледате можноста на регионот на Западен Балкан да се овозможи пренасочување на неискористените средства од Инструментот за претпристапна помош (ИПА 2) за борба против пандемијата на Ковид-19, како и користење на сите други средства од различните фондови на Европската Унија што стојат на располагање за оваа цел“, се барањата на претседателите и претседавачите на Собранијата во шесте земји од регионот.