Нема можност за свикување на распуштениот парламентраен состав. Собранието може да се врати само по следните избори, изјави претседателот на Собранието, Талат Џафери за време на гостувањето во емисијата „Клик плус“ на ТВ 21.
Џафери вели дека секој друг начин освен по избори за заседавање на Собранието е обид за пуч. Тврди дека се вршел притисок врз него за повторно свикување на пратениците и заседавање на Парламентот, но, како што нагласува „со Собранието е веќе завршено“.
„На 16-ти февруари секој пратеник гласаше за престанок на мандатот. Собранието ќе се собере по наредните избори“, вели собранискиот спикер, коментирајќи ја иницијативата за повторно свикување на законодавниот дом.
Ваквиот став на Џафери доаѓа по иницијативата на СДСМ за свикување на Собранието за, според владеачката партија, за седница на која би се потврдиле одлуките за вонредна состојба на претседателот Стево Пендаровски од 18 март, односно 17 април, но би било добро, како што велат, да биде и контролен механизам на Владата која во изминатиот период носи уредби со законска сила. За претседателот на Парламентот, сепак, „нема можност за такво нешто“.
„Собранието може да се врати само на следните избори и тоа може да го стори народот“, изјави Џафери.
Против иницијативата на СДСМ за свикување на парламентарниот состав се изјасни опозициската ВМРО-ДПМНЕ.