Здравствените власти сметаат дека во земјава може да биде постигнат процент на имунизирани лица за кој ќе може да се каже дека е колективен имунитет на ковид-19 до крајот на летниот период. Дотогаш, како што изјави ресорниот министер Венко Филипче, би можеле да бидат вакцинирани околу 600.000 граѓани, што е 50 проценти од планираната популација за вацинација.
Податоците што ги објави вчера Министерството за здравство за претходните 24 часа покажуваат дека продолжува трендот на мал број на заразени со коронавирусот. Од направените 2.952 тестирања, вчера беа регистрирани 13 нови случаи на ковид-19, немаше починати лица, а регистрирани беа и 31 оздравен пациент. Во државава во моментот се активни 225 случаи со ковид-19, а од почетокот на епидемијата со вирусот се заразиле 155.640 лица.
– Досега се вакцинирани под 300.000 граѓани, а планирано е во следниот период да се вакцинираат уште 300.000 луѓе. Сметам дека до крајот на летото ќе постигнеме процент на имунизирани за кој ќе можеме да кажеме дека е колективен имунитет, изјави Филипче одговарајќи на новинарско прашање.
Сè уште, како што вели, не се знае како ќе влијаат мутациите на коронавирусот, но искуствата од другите држави, вклучувајќи ја и Кина, покажуваат оти вакцините се многу важен фактор во борбата против пандемијата и дека спречуваат тешки форми на болеста.
Министерот за здравство посочи дека со оглед на тоа што до крајот на месецот ќе стасаат 500.000 дози на вакцини од кинескиот производител „Синовак“, како и поголеми дози вакцини на „Фајзер“, ќе може да се вакцинираат по 15.000 до 20.000 граѓани на ден. Вакцините од понеделник ќе бидат распределени на пунктовите за вакцинација, најави Филипче.
Во земјава досега се вакцинирани над 278.000 граѓани. Вкупно се аплицирани 482.058 дози на вакцини, а ревакцинирани се 203.856 граѓани. Како што соопшти Министерството за здравство, 50 проценти од населението над 70 години има примено барем една доза на вакцина, 45 отсто од населението над 65 години е вакцинирано со барем една доза вакцина и 38 отсто од населението над 60 години е вакцинирано со барем една доза вакцина.
Според МЗ, вакцинацијата се одвива непречено на сите пунктови низ државата, интересот за вакцинација секојдневно се зголемува, а досега желба за вакцинација преку веб платформата vakcinacija.mk изразиле 456.607 граѓани.