Американската потпретседателка Камала Харис денеска рече дека „сè е на маса“ додека САД ги оценуваат економските санкции наметнати на Русија поради нападот врз Украина, и повтори дека САД нема да испраќаат војници да се борат со руските сили во Украина.
„Она што ќе продолжиме да го правиме е да останеме цврсто со нашите сојузници во однос на она што го правиме со санкциите. Сè е на маса за разгледување“, изјави Харис за мрежата NBC.
Харис продолжи: „Она што нема да го направиме и тоа мора да се каже исто така, како што претседателот постојано кажува, е дека нема да ставаме американски војници во Украина да се борат против Русите на земја или во воздух. Но, ние сме цврсти во нашата подготвеност да го браниме нашиот НАТО сојуз и нашите сојузници, секоја педа од територијата на НАТО, и ќе продолжиме да го правиме тоа“.
Харис изјави за „Добро утро Америка“ на ABC дека САД внимателно ги следат дејствијата на Русија и проценуваат дали имало намерно таргетирање цивили и кршење на меѓународното право.
„Ние сме многу загрижени и го следиме тоа. Ова е прашање на кое сите треба да обрнеме внимание. Тоа е ѕверство и прекршување на сите стандарди и принципи кои ние, особено како земји на НАТО ги сфаќаме сериозно во однос на заштитата на суверенитетот и територијалниот интегритет на која било држава“, изјави Харис за ABC.
Харис рече дека САД ќе продолжат да обезбедуваат хуманитарна помош, како и безбедносна помош за народот на Украина.
Харис посочи за NBC дека Русија веќе ги чувствува ефектите од економските одмазднички мерки што САД ги воведоа против нив.
„Рубљата е во слободен пад. Она што го видовме е дека руската берза е затворена. Она што го видовме е дека Русија доби низок кредитен рејтинг. Значи, знаеме дека има влијание“, рече таа.
„Она што ќе го покаже историјата е дека Владимир Путин во основа го зајакна НАТО и ја ослабна Русија“, рече потпретседателката. Харис рече дека вчера разговарала со лидерите на Летонија, Литванија, Словенија и Романија за тоа како САД ќе продолжат да ги поддржуваат своите сојузници.
Таа, исто така, го пофали украинскиот претседател Володимир Зеленски, велејќи дека тој „покажа извонредна храброст“ и „беше инспирација за сите нас“.