Претседателот на Србија Александар Вучиќ изјави денес дека патот на Србија кон членство во Европската Унија зависи од геополитичката ситуација и дека не е оптимист, како министерската за европски интеграции Јадранка Јоксимовиќ, која претходно изјави дека Србија може да стане членка на ЕУ „во следните пет до седум години“.
Вучиќ на конференција за новинарите по повод отворањето на аеродромот Росуље во Крушевац кажа дека патот на Србија е европскиот пат и дека „на него треба да се издржи“, но дека е „реалист по тоа прашање“.
„Веруваме во нашите сили, покажавме дека можеме со својата работа, опстојувајќи на европскиот пат и чувајќи ги традиционалните пријателства, земјата толку да ја унапредиме, до непрепознатливост“, кажа Вучиќ.
Одговарајќи на новинарско прашање за ставот на Србија кон абортусот, кој во Соединетите Американски Држави со одлука на Врховниот суд повеќе не е уставно право на жените, Вучиќ кажа дека „Србија не планира ништо да менува по тоа прашање“.
„Никогаш не би поддржал такво нешто, затоа што сметам дека абортусот е право на жената. Дали тоа ми се допаѓа или не, тоа е друго нешто. Ние имаме правила и закони кои за тоа јасно зборуваат“, кажа српскиот претседател.