„Показател за фундаментален напад на интегритетот на спортот“. Вака Томас Бах, претседател на Интернационалниот олимписки комитет (ИОК), го опиша најновиот дел од извештајот на професор Ричард Мекларен објавен вчера за наводно системско допингување на спортистите од Русија. Тој притоа нагласи потреба од доживотна суспензија на Олимписки игри за секој натпреварувач, тренер или официјално лице за кои се утврдило и ќе се утврди вмешаност во „софистициран манипулативен систем“.
Во последниот дел од извештајот на Мекларен за Светската анти-допинг агенција (ВАДА) се вперува прст кон повеќе од 1.000 спортисти од Русија кои, наводно, се вмешани во системски допинг во период на цел олимписки циклус почнувајќи од 2011 година.
Затоа Бах најави соработка на ИОК и Мекларен за прегледување на сите примероци на руските спортисти на Зимските олимписи игри во Сочи во 2014 година. Но, додаде и дека ќе го продолжи мандатот на Дисциплинската комисија при ИОК за повторно теестирање на сите примероци на олимпијците од Русија на Игрите во Лондон во 2012 година.
Материјалот на Мекларен ги опфаќа Летните олимписки игри во Лондон во 2012 година, Светското првенство во атлетика во 2013 година и Зимските олимписки игри во Сочи во 2014 година во повеќе од 30 спортови во кои, наводно, се прикривале допинг примероци.
Руските спортисти освоија 72 медала во Лондон од кои 21 златен и 33 во Сочи од кои 13 златни.