Во Албанија се потврдени 21 случај на заразени лица со Делта сојот на коронавирус од кои осум се „увезени“, додека остатите се семејни кластери, изјави Силва Бино, раководителка на Одделот за епидемиологија, при Институтот за јавно здравје и член на комитетот за справување со пандемијата со ковид-19.
– По два случаја се донесени во земјава од Велика Британија и од Германија, додека по еден случај од Чешка, од Шпанија, од Северна Македонија и од Пакистан. Случајот од Пакистан беше без клинички знаци, како дел од скрининг, во оваа група тестови која беше испратена во лабораторијата во Берлин. Овие случаи, предизвикаа семејни жаришта, што потврдува дека имаме висока инциденца на зараза, рече таа.
Според неа, заразените се лица на возраст од 16 до 77 години, а девет од нив се хоспитализирани. Додаде дека од 21 заразено лице со Делта сојот, шест биле вакцинирани.
– Две од заразените лица биле вакцинирани во април во Велика Британја со „АстраЗенека“, две со една доза на „Фајзер“ во Германија, додека две лице имале примено две дози од вакцината на Коронавакс, рече Бино.
Преседателката на комитетот и заменик министерка за здравство Мира Ракацоли смета дека новата епидемиолошка состојба не наметнува други ограничувачки мерки освен постојните, за кои смета дека ќе ја контролираат состојбата, посебно потенцирајќи дека останува и понатаму во сила полицскиот час од полноќ до 6 часот и мерката за задолжително носење заштитна маска во затворен простор.
Таа упати апел за поголема масовност за имунизација против опасниот вирус, процес со кој досега се опфатени над 1,117 милиони граѓани во земјата.