Албанскиот претседател Илир Мета упати честитка до претседателот на Република Северна Македонија, Стево Пендаровски и до сите граѓани на државава по повод Денот на независноста.
„Дозволете ми со посебно задоволство во мое и во име на албанскиот народ да упатам искрени честитки и топли братски поздрави до Вас и сите ваши граѓани. Искажувам убеденост дека благодарение на вашата волја, искуство и визија одличните меѓусоседски односи и соработка, кои постојат меѓу нашите земји и народи ќе се зацврстуваат во иднина“, стои во честитката на Мета.
Посочи дека големо влијание во зацврстувањето на односите меѓу двете земји имало и има постојаното подобрување на меѓуетничките односи.
„Горди сме за исклучителниот придонес што го даваат Албанците во Северна Македонија за стабилноста и евроатланската интегрција на земјата. Убеден сум дека македонската заедница во нашата земја ќе продолжи да биде силен мост на пријателство и соработка меѓу нашите две земји и народи“, стои во честитката.
Тој ја поздрави визијата и храброста во постигнувањето на историскиот договор од Преспа, кого го нарекува пример за целиот регион, кој „не само што ќе ја зацврсти евроатланската перспектива на земјата, туку ќе го направи регионот побезбеден”.