Каталонија очекува конструктивна реакција од ЕУ и европско медијаторство за отворање дијалог помеѓу Мадрид и Барселона, изјави денес за белгиското радио претставникот на каталонскиот регион во Брисел Амадео Алтафаж.

“Она што го направи шпанскиот премиер Мариано Рахој со наредбата за насилство во Каталонија е срамота за целата ЕУ. Каталонците денес се чувствуваат уште подалеку од државата која прави репресија врз нив без оглед на нивниот став за независноста. Денес Каталонците чувствуваат болка поради овие напади на безбедносните сили испратени од Мадрид врз граѓаните кои сакаа гласаат”, вели Алтафаж.

Желбата на Каталонија да биде независна не е од вчера но на оваа тема малку се знае а во ЕУ засега владее тишина во однос на ова прашање. Според Алтафаж, Каталонија со години бара да дијалог за шпанската влада но досега не успеала да добие задоволителен одговор. За Каталонците, најдобро би било ЕУ да биде посредникот во разговорот помеѓу Мадрид и Барцелона:

“Ние веќе 7 години бараме да седнеме на маса и да разговараме. Oд другата страна наидуваме на систематско одбивање за политички дијалог и тоа доведе до поларизирање на ставовите кое денес е поголемо од кога и да е досега. Ние рековме дека сме подготвени во секое време да седнеме на масата на дијалогот и преговарањето. А ако тоа не може да биде направено билатерално, ние сме отворени и за посредување од трета страна и ние посакуваме тоа да биде европско медијаторство”, изјави каталонскиот претставник во Брисел.

Тој додаде дека дошле први реакции од Белгија, Словенија и Литванија а рече дека и Ангела Меркел му се јавила на Рахој да му каже дека насилството не е добра опција.

“Нас не интересира контруктивниот став на ЕУ. Ако Европа не е способна да има конструктивна реакција во ситуација на нарушување на граѓанските права на Каталонците, тоа ќе значи дека ЕУ има проблем со фундаменталните права. Не бараме од ЕУ да се меша туку да бдее врз европските повелби и тоа членот 2 од Повелбата на ЕУ за фундаменталните права и само предупредување на ЕУ до Мадрид поради преголемата употреба на сила. Стравувам дека Мадрид ова молчење на ЕУ институциите ќе го протолкува како зелено светло за насилство и судска репресија”, додава Алтафаж.

На вестите дека Каталонија се спрема да прогласи независност оваа недела по резултатот од референдумот Алтафаж вели дека престедателот на Каталонија Пучдемон ќе го констатира резултатот и ќе извлече политички заклучоци пред каталонскиот парламент:

“А тоа е јасната волја да се стане држава. Претседателот вчера изјави дека Каталонија го доби правото да биде почитувана а нејзината политичка волја мора да биде земена во предвид. Каталонија има право да одлучува за нејзината иднина и да се огради од една држава која не е повеќе во служба на своите граѓани”.