Компаниите во земјава кои увезуваат мазут, што бил предмет на контрола и анализа од институциите, да побараат второ мислење кај независна лабораторија, доколку се сомневаат во наодите од подвижната државна лабораторија, порача министерот за економија, Крешник Бектеши. Истовремено, за утре, а најдоцна до среда, тој најави дека ќе објави имиња на компании во чиј мазут се утврдени неправилности при увозот. Притоа, како што дополни, ќе ги сподели и наодите од анализите што ги прават надлежните институции.
– Секоја компанија која изразува недоверба во резултатите од анализите на државната подвижна лабораторија, може да се обрати за второ мислење кај независна лабораторија, рече Бектеши.
Првиот човек на Економија уверува дека процесот е транспарентен и неселективен, пришто контролите се вршат кај увозот на нафтени деривати и во рамки на внатрешниот пазар за период од три години. Според него, направени се контроли и кај дел од складиштата на компаниите што се занимаваат со продажба на мазут.
Бектеши потенцира дека компаниите што не ги исполнуваат критериумите во Правилникот, може да останат без лиценца за работа или, пак, да добијат прекршочна казна за што е надлежна Регулаторната комисија за енергетика (РКЕ).
Што се однесува на петте вратени цистерни од Царина, министерот за економија повтори дека во тој случај е утврдено поголемо присуство на вода и на прашина од дозволеното.
– Ако во Правилникот и согласно македонскиот стандард е предвидено еден процент, одредени цистерни имале над четири проценти вода. Но, проблем не е само водата, туку имало надминување и на параметрите во однос на пепелот. И во внатрешниот пазар се направени контроли кај дел од складиштата кои се занинаваат со продажба на мазут. И таму се надминати некои од параметрите, рече Бектеши.
Бектеши смета дека Министерството за економија нема одговорност во аферата со квалитетот на мазутот, бидејќи ресорот е одговорен само за подзаконските акти, но не и во делот на спроведување и вршење контрола.
– Она што можам да го кажам е дека Правилникот, во делот на квалитет на течните горива, е целосно усогласен со барањата на Европската енергетска заедница. Во делот на спроведување и вршење контрола не е надлежно Министерството за економија. Има други надлежни институции кои директно одговараат пред Владата, но ние како одговорно Министерство секојдневно вршиме состаноци со цел да дојдеме до наоди каде имало пропусти. Сите информации кои ќе доставиме до надлежните институции. Министерството за економија не е јавно обвинителство, наведе Бектеши.