Белгиските парламентарци ја одобрија резолуцијата предложена од Социјалистичката партија со која се бара вакцините против ковид-19 да станат јавно добро достапно за сите, јави дописничката на МИА од Брисел.
Резолуцијата ја повикува владата на Белгија да се обрати до Европската Унија (ЕУ), до Обединетите Нации (ОН) и до Светската здравствена организација (СЗО) и да побара глобална стратегија, на светско ниво, која ќе овозможи жителите во сите земји, посебно најсиромашните, да имаат брз, евтин и еднаков пристап до вакцина против коронавирусот.
Парламентарците потсетија дека колку подолго трае оваа криза толку поголем е ризикот од појава на нови соеви и мутации кои можат да станат отпорни на вакцините.
Радикалната левица се воздржа при гласањето за оваа резолуција затоа што смета дека не оди доволно далеку. Начелно денеска парламентарците требаше да гласаат за резолуција во која ќе се бара целосно укинување на патентите врз вакцините. За Партијата на работниците на Белгија овој текст е само декларативна намера и остава простор за „доброволни лиценци“.
Што се однесува до екстремната десница, една партија се воздржа, другата гласаше против резолуцијата.