Белград и Приштина синоќа во Брисел се договорија да продолжат со дијалогот во духот на почитување, соработка и меѓусебно разбирање. Разговорите на двете страни во идните денови ќе се интензивираат.
“Решивме во следниот период да одржиме серија состаноци во рамките на дијалогот на високо ниво”, порача Федерика Могерини.
Шефицата на ЕУ дипломатијата Могерини ги викна во Брисел двајцата претседатели – Томислав Николиќ и Хашим Тачи и двајцата премиери – Александар Вучиќ и Иса Мустафа. Тензиите помеѓу двете држави во последните недели почнаа да стануваат експлозивни. Двете страни разменуваа националистичка и воена реторика и провокации па Могерини одлучи дека е време да влезе на сцената и да ги смири тензиите.
Лидерите на Србија и на Косово по состанокот во Брисел се договорија на натамошни разговори на високо ниво за нормализирање на односите по тензиите во изминатиов период. „Се договоривме да го продолжиме дијалогот на високо ниво во наредните денови. Ќе се обидеме да ги намалиме тензиите меѓу двете страни“, изјави српскиот премиер Александар Вучиќ по средбата.
Пред состанокот, косовскиот претседател Хашим Тачи го обвини Белград дека се обидува да го дестабилизира Косово со цел да ја преземе контролата врз северниот дел на Косово. По разговорите Тачи изрази надеж дека Србија ќе го искористи состанокот за да ги смири националистичките претензии. И порача дека косовските институции ќе одговорат во иднина на српските провокации во согласност со своите закони.
Српскиот претседател Николиќ изјави дека „не им препорачува“ на Албанците да го загрозуваат мирот и безбедноста никаде на територијата на Косово, а посебно не во северниот дел. И го повтори својот став дека Србија нема да разговара за независност на Косово.
На средбата станало збор за возот украсен со српски национални и верски симболи, со натписот „Косово е Србија“ на 21 светски јазик, кој тргна од Белград кон Митровица и кој беше вратен назад, без да влезе на територијата на Косово поради заканите со експлозиви и тензична состојба.
Во Приштина тоа беше оценето како провокација.
За Белград провокација беа специјалните косовски полициски сили кои тргнаа на северот на Косово за да се спречи влегувањето на возот.