Земјите-членки на Европската Унија (ЕУ) разговарале за ситуацијата на Западeн Балкан на ниво на министри за надворешни работи и го повториле заклучокот дека само дијалог под медијаторство на ЕУ е решение, јави дописничката на МИА од Брисел.

Високиот претставник за надворешна политика, Жосеп Борел на прес-конференцијата на крајот на министерскиот состанок на ЕУ изјави дека Белград и Приштина треба да се вратат на преговарачка маса во Брисел.

Тензиите меѓу Белград и Приштина на северот на Косово предизвикаа голема загриженост во ЕУ. Хрватскиот министер за надворешни работи, Гордан Грлиќ Радман утрово предупреди дека ситуацијата во регионот се влошува и дека ЕУ треба да посвети дискусија на оваа тема.

Шефот на европската дипломатија уште еднаш ги повика лидерите да се посветат на дијалогот за нормализација на односите за да избегнат слични тензии како што се случија во последните недели.

„Ситуацијата на границата меѓу Косово и Србија е многу тешка. Разговарав со претседателот Вучиќ и со премиерот Курти, последните случувања и договорот од 13 септември покажаа дека нашиот ЕУ дијалог е единствениот начин за напредок и ги повикуваме и двајцата да се вратат на ситуација каде дијалогот ќе може да продолжи“, изјави Борел денеска.