„Го најде ли Барселона стадионот „Парк на принцевите“ во Париз?“, „Каде се загуби Барса во главниот град на Франција“, „Зошто Меси, Суарез и Нејмар не излегоа на терен да играат“. Ова се само дел од коментарите на социјалните мрежи по дебаклот што „светците“ го приредија на Каталонците во првиот осминафинален натпревар во фудбалската Лига на шампиони.

Унаи Емери го надмудри Луис Енрике, францускиот состав го надигра шпанскиот со преубедливи 4:0 и пушти нога кон четврт-финалето во елитното натпреварување. Анхел ди Марија и Единсон Кавани на најдобар начин се почестија на своите родендени. Аргентинецот постигна два гола, Уругваецот еден, а во листата на стрелци се впиша и Јулијан Дракслер.

Домашната екипа беше доминантна во текот на сите 90 минути и не допушти ни милиметар простор на гостинските фудбалери да се размавнат. Стои онаа „никогаш не речи никогаш“, но тешко е да се замисли дека Барса ќе може на „Камп Ноу“ да возврати поубедливо и да избегне елиминација од ЛШ во раната нокаут фаза.

Иако има уште 90 минути, сепак, многумина го делат мислењето дека вечерва Европа го доби првиот четвртфиналист. И тоа заслужено. Изданието на парижани беше беспрекорно што го отсликува и резултатот. Триумфот можеше да биде изразен и со поголема разлика ако Тер Штеген во неколку ситуации не спасуваше чисти голови.

Во вториот меч Бенфика ја совлада Борусија Дортмунд со 1:0. Стрелец на единствениот гол беше Митроглу во 48 минута. „Милионерите“ пристигнаа во Лисабон како најефикасна екипа во групната фаза во Лигата на шампиони со рекордни 21 гол, но вечерва не успеаја ниту еднаш да го пронајдат патот до мрежата на португалскиот клуб и покрај многуте прилики што ги имаа. Впечатокот ќе се обидат да го поправат на својот „Вестфален“ во реваншот на 8 март.

Лига на шампиони

Осминафинале – први мечеви

ПСЖ – Барселона 4:0

Бенфика – Борусија Дортмунд 1:0