Откако завршија расправите на Државната изборна комисија по приговорите на партиите СДСМ и Беса, партиите имаат 24 часа да поднесат жалби до Управниот суд за донесение одлуки на Комисијата.
Од приговорите, еден е прифатен на Беса, два приговора беа повлечени од СДСМ, а сите други се одбиени.
Управниот суд има 48 часа да донесе конечната одлука, за да се официјализираат резултатите од предвремените парламентарни избори на 11 декември.
ДИК прифати само еден приговор на Беса за неправилности при гласањето на избирачкото место 0396/1 во Гостивар. Според заклучокот, гласачката Фатиме Сулејмани не можела да го искористи своето право на глас затоа што претходно некој, во нејзино име, веќе гласал.
Оваа одлука беше донесена откако графолошката анализа покажа дека потписот во Ибирачкиот список на местото на Сулејмани, не бил нејзиниот.
Членови на избирачкиот одбор сведочеа дека Сулејмани се обидела по вторпат да гласа и дека на нејзиниот прст, при прегледот со УВ лампа, имало траги од спрејот со што имало сомневање дека таа веќе гласала.
Прегласувањето во ова избирачко место, кое брои над 800 гласачи, може да го смени конечниот резултат за освоени мандати од ИЕ 6, ако се знае дека таму разликата меѓу ВМРО-ДПМНЕ и СДСМ е околу 300 гласа.
Сега одлуката “лежи“ кај Управен, кој пак беше лично повикан од претседателот на ВМРО-ДПМНЕ, Никола Груевски да не подлегнува на никаков притисок.
Но сепак, Груевски потенцираше дека, доколку се прегласува, неговата партија нема да учествува и нема да ги признае гласовите.
„Ако со прегласување дојде до промена на мандатите и промена на победникот на изборите, ВМРО-ДПМНЕ нема да ги признае тие резултати и нема да дозволи да биде фалсификувана волјата на народот. Незаконските одлуки на ДИК може да ги корегира Управниот суд. Но, доколку и Управниот суд потклекне на влијанијата од страна и ги потврди незаконските одлуки на ДИК и со тоа ја одземе победата на ВМРО-ДПМНЕ и на македонскиот народ, тогаш ВМРО-ДПМНЕ нема да учествува во прегласувањето и нема да ги признае резултатите од тоа прегласување“, порача меѓу другото Груевски.