Демократската унија за интеграција (ДУИ) денеска предложи дневен ред за утрешната заедничка средба со лидерите на партиите од албанскиот политички блок што ја иницира претседателот на партијата, Али Ахмети. Од таму велат дека агендата може да биде дополнета и изменета со предлози од сите учесници на средбата со предлоф формат – претседател плус двајца соработници.
„За состанокот во четврток со почеток во 12 часот, ја предлагаме следната агенда: Статус на реализација на определбите од Заедничката декларација во претходниот мандат, Евалуација на предвремените парламентарни избори од 15 јули 2020 година; Формирање на меѓупартиски совет во согласност со заедничката декларација и утврдување на рокови за реализација на заедничките цели“, се вели во партиското соопштение.
ДУИ, се посочува во партиското соопштение, останува достапна и отворена за натамошни средби во текот на следната недела или на кој било иден датум за кој, како што се вели, ќе се договориме заеднички на утрешната средба и изрази благодарност до сите албански парламентарни партии за коректната комуникација, потврдниот одговор и добронамерните предлози.
Села и Гаши ја прифатија поканата на Ахмети, но не за утре, туку по 17 август
Алијансата за Албанците и Алтернатива ја прифатија поканата од ДУИ за зaедничка средба на лидерите на партиите од албанскиот политички блок, но бараат наместо утре, таа да се одржи по 17 август.
„Сметаме дека политичкиот механизам на тркалезната маса е важен политички инструмент за координирање на позициите на албанските парламентарни партии и како таков, сметаме дека треба да продолжи да се негува за артикулација на албанските интереси во Северна Македонија. Размислете за можноста за друг датум почнувајќи од понеделник (17.08.2020) натаму, секако со известување неколку дена претходно со дневниот ред на средбата“, се вели во писмото на Алијансата за Албанците и Алтернатива до претседателот на ДУИ, Али Ахмети.
За да имаме суштински и плоден состанок, се посочува во партиското писмо, би било добро поканата да има предлог за агендата, за да, како што велат, имаат појасна идеја за причината за организирање на средбата на тркалезната маса на албанските парламентарни партии.