Европското првенство за ракометарки до 17 години чиј домаќин е Македонија продолжува без Грција. Континенталната ракометна федерација (ЕХФ) ја казни кадетската селекција на јужниот сосед со дисквалификација од турнирот по одлуката на нејзиното раководство за повлекување на тимот по 32 секунди во натпреварот со „црвено-жолтите“. Причина беше натписот „Macedonia“ испечатен на грбот на маичките на стручниот штаб.
Покрај исфрлување на репрезентацијата од ЕП и службениот пораз со 0:10, грчката федерација ќе плати и 25.000 евра казна, но можеби ќе мора да поднесе и дополнителни финансиски трошоци во врска со случајот.
Грција воопшто не сакаше да го започне дуелот со Македонија и се повлече во соблекувална во времето предвидено за загревање. На тоа следуваше реакција од претставници на ЕХФ и на Ракометната федерација на Македонја (РФМ) кои презедоа улога на медијатори во обид да ги вратат гостите на терен и натпреварот да се одигра. Убедувањето даде резултат, но за кратко. Мечот почна и по половина минута дојде до ново повлекување од грчка страна, а по задолжителното 15 минутно чекање, судиите означија крај на средбата.
Чести се заложбите за спорт без политика или политиката надвор од спортот, како сакате. Овојпат ЕХФ цврсто се држеше до тоа и со својата конечна одлука стави до знаење за што се спортските терени на кои не им е место за прашања што задираат друга сфера и немаат допирна точка со спортот.