Македонија на секој натпревар оди на победа, а така ќе биде и утре против Казахстан во последната проверка пред Европското фудбалско првенство, најави Елиф Елмас, чие дело беше единствениот погодок во ремито (1:1) со Словенија во вторникот. Но, играчот на Наполи испорача уште една желба – максимално исполнет капацитет на арената „Тоше Проески“, согласно епидемиолошки протоколи што се на сила поради пандемијата на ковид-19.

– Чувството да се игра пред гледачи е посебно и многу сме среќни што публиката се враќа на стадионите. Секогаш сме уживале поддршка од навивачите и не се сомневам дека така ќе биде и утре. Можам да ветам одлична игра, а моја желба е со победа да ги израдуваме фановите пред Европското првенство, истакна Елмас.

Казахстан ќе претставува одличен тест, смета Елмас, што го поткрепи со фактот дека нашиот утрешен ривал одигра 1:1 против Украина, втор противник на „црвено-жолтите“ во Букурешт во рамки на групата Ц на ЕП 2020 (17 јуни, 15 часот). Фудбалерот на Наполи притоа сподели и дел од очекувањата за континенталниот турнир.

– Досега направивме голема работа, но сакаме уште. На ЕП одиме да се докажеме. Знаеме што поседуваме, знаеме со кого ќе се соочиме, напорно работевме во изминатиот период и се надевам дека ќе нè послужи здравјето да дадеме максимум на ЕП и да приредиме радосни моменти за нацијата, изјави Елмас.