Реал Мадрид го совлада Панатинаикос во последниот вечерашен дуел со кој се заокружи седмото коло во кошакарската Евролига. Конечни 87:84 за „кралевите“ за петта нивна победа во сезоната во која имаат и два пораза. Серхио Љуљ немилосрдно го полнеше кошот на гостите од Атина и мечот го заврши со 30 поени, еден скок и четири асистенции, Ентони Рендолф уфрли 12, сите останати нивни соиграчи беа едноцифрени. Џејмс Фелдеин беше најрасположен кај ПАО до 19 коша.
Дарушафака се погрижи да нема непоразени екипи во конкуренција по оваа рунда. Тимот од Истанбул е првиот со скалпот на ЦСКА Москва по триумфот над „армејците“ на домашен терен со 91:83. Турскиот клуб беше подобар ривал во првите три четвртини, константно ја зголемуваше предноста и во последниот период влезе со плус 16. Рускиот гигант се разбуди и му даде драматичност на финишот, се доближи на само половина кош, но сили за продолженија или пресврт, сепак, немаше.
Бред Вонамејкер беше лидер во победничката екипа со 18 коша, пет скока и седум асистенции, Нандо де Коло и Кори Хигинс реализираа по 17 за гостите од Москва.
Евролига
Резултати, 7. коло
Реал Мадрид – Панатинаикос 87:84
Жалгирис – Галатасарај 87:75
Олимпијакос – Барселона 59:52
Дарушафака – ЦСКА Москва 91:83
Армани Милано – Басконија 88:76
Макаб Тел Авив – Фенербахче 87:77
Бросе Бамберг – Црвена звезда 78:79
Анадолу Ефес – Уникс Казан 104:99
Табела: ЦСКА Москва (6 победи-1 пораз), Дарушафака (5-2), Реал Мадрид (5-2), Панатинаикос (3-1 победа во продолженија-1 пораз по продолженија-2), Басконија (4-3), Олимпијакос (4-3), Армани Милано (4-0-1-2), Барселона (4-3), Фенербахче (4-3), Макаби Тел Авив (3-0-1-3), Црвена звезда (3-4), Анадолу Ефес (2-1-0-4), Бросе Бамберг (1-1-0-5), Жалгирис (2-5), Уникс Казан (2-5), Галатасарај (1-6).