Фенербахче се впиша во листата на освојувачи на кошаркарската Евролига. До премиерната титула во престижното клупско натпреварување на стариот континент, тимот од Истанбул стигна по победата над Олимпијакос со 80:64 (по четвртини: 26:18, 13:16, 21:14, 20:16) во финалето на Фајналфор турнирот и стана прв турски претставник што успеал до тронот по ланскиот пораз од ЦСКА Москва по продолженија.
Перо Антиќ по третпат во кариерата е на страна на шампионска екипа во Евролигата, сега против екипата од Пиреја со која ги подигна претходните два трофеја во 2012 и во 2013 година. Македонскиот интернационалец не настапи во полуфиналето против Реал Мадрид (84:75), но доби нешто повеќе од осум минути во мечот за титулата во „Синан Ердем Дом“. Времето минато на паркетот го пополни со четири поени (1/2 слободни фрлања, 1/2 за тројка) и еден скок (дефанзивен).
И Жељко Обрадовиќ додаде уште една во неговата, и онака, импресивна тренерска кариера. Српскиот менаџер ја покори елитата по деветти пати со петти различен клуб. По Партизан во 1992 година, Хувентуд во 1993, Реал Мадрид во 1995 година и Панатинаикос во 2000 година, во 2002, во 2007, во 2009 и во 2011, дочека и со Фенербахче во 2017 година.
Олимпијакос одржуваше чекор со Фенербахче во првото полувреме и на почетокот на второто. Меѓутоа, екипата од Истанбул во третиот период направи серија од 11:2 што беше пресудна за трасирање на патот кон посакуваната цел. Таквиот впечаток се потврди во последната четвртина во која домашните поведоа со 18 поени разлика за кршење на отпорот и противникот и мирно привршување на финалето.
Никола Калиниќ и Богдан Богдановиќ уфрлија по 17 поени, двоцифрени беа уште Луиџи Датоме со 11 и Екпе Јудо, МВП на финалниот турнир, со 10. Кај поразената екипа, Кем Бирч постигна 14, Никола Милутинов го додаде 10. Сите останати играчи во ростерот на Јоанис Сфаиропулос беа запрени на едноцифрен број реализации.
Бранителот на титулата, ЦСКА, овојпат мораше да се задоволи со бронзен медал. Московјани во мечот за третото место го поразија Реал Мадрид со 94:70 (по четвртини: 23:10, 22:22, 24:24, 25:14). Кајл Хајнс со 14 поени и Нандо де Коло и Арон Џексон по 13 беа најефикасни меѓу „армејците“, на спротивната страна по 11 дадоа Густаво Ајон и Јонас Мациулис.
Евролига – Фајналфор
Финале: Фенербахче – Олимпијакос 80:64 (по четвртини: 26:18, 13:16, 21:14, 20:16)
За трето место: ЦСКА Москва – Реал Мадрид 94:70 (по четвртини: 23:10, 22:22, 24:24, 25:14)
Полуфинале
Фенербахче – Реал Мадрид 84:75 (по четвртини: 21:13, 23:21, 19:16, 21:25)
Олимпијакос – ЦСКА Москва 82:78 (по четвртини: 18:12, 22:21, 24:27, 14:22)