Доналд Трамп се закани вчера дека во секој момент може да стави крај на меѓународниот договор кој има за цел да го спречи Иран да направи атомска бомба. Со своите вчерашни изјави, американскиот претседател ги загрижи сите земји потписнички на овој договор потпишан во 2015 година по 13 години интензивни преговори.
– Време е целиот свет да ни се приклучи во обидите да ги спречиме иранските власти да тежнеат кон смрт и уништување, истакна Трамп велејќи дека овој договор е најлошиот договор потпишан од САД.
Тој имаше говор во кој зборуваше за «диктаторскиот режим» во Иран и додаде дека САД ќе се спротиставуваат на дестабилизирачкото влијание на Техеран за да ја запрат неговата агресивност со помош на поголем број земји од регионот.
Но светот е далеку од оваа опција и воопшто не го дели ставот на Трамп. Така, Јукиа Амано, првиот човек на Меѓународната агенција за атомска енергија (АИЕА) изјави дека Иран е предмет на «најсолидните проверки за нуклеарно оружје».
Се разбира, говорот на Трамп предизвика силна реакција во Техеран па иранскиот претседател изјави дека САД се осамени во нивниот став против иранскиот народ.
Москва исто така го изрази своето негодување а истото го стори и Федерика Могерини, шефицата на ЕУ дипломатија во име на сите земји членки. Таа предупреди дека ова е обид да се растури «договор кој функционира и ги исполнува дадените ветувања».
Британската премиерка Тереза Меј, германската канцеларка Ангела Меркел и францускиот претседател Емануел Макрон испратија соопштение за да подвлечат дека нивните земји го поддржуваат договорот за кој се преговараше 13 години и повикаа на «целосна примена на договорот од сите потписнички».
Макрон дури му се јави на иранскиот претседател Хасан Рохани за да му пренесе дека Франција останува во договорот и дека има намера да патува во Техеран.
Трамп не пропушти да «твитне» и напиша дека сите земји што го поддржуваат договорот «прават многу пари во трговијата со Иран».
И додека целиот свет го поддржува договорот со Иран, израелскиот премиер Бенјамин Нетањаху му испрати честитки на Трамп поради «храбрата одлука». Истото го стори и Саудиска Арабија, сунитската монархија кои стравува од зајакнување на Иран.
Техеран и Вашингтон ги прекинаа дипломатските односи во 1980 година по исламската револуција од 1979 година. Администрацијата на Барак Обама учествуваше во меѓународните преговори со Техеран со надеж дека «овој договор дава шанса да се тргне во нова насока».
Но од самиот почеток на неговото влегување во Белата куќа Трамп го заострува тонот кон Иран. Со новиот чекор списокот на меѓународни договори што САД ги напушта продолжува да расте. Како договорот за северно-американска слободна размена Алена, парискиот климатски договор а од вчера САД најавија излегување од Унеско.
Извор: АФП