Европратеникот Томас Вајц, кој е во посета на БиХ заедно со претседавачот на Делегацијата на Европскиот парламент за соработка со БиХ и Косово, Ромео Франц, во неделата изјави оти добил гаранции од генералите на НАТО дека може да бидат распоредени до 6.000 војници во земјата, во рок од 24 часа до седум дена, доколку е потребно.
Во ексклузивното интервју за Н1, на прашањето „дали сака да каже дека меѓународната заедница е во мирување“, Вајц одговори:
Да. „Свесен сум колку млади луѓе ја напуштија земјата, бидејќи постои страв од нова војна. За среќа, Република Српска нема пристап до такво оружје како што имаше во балканските војни. Тоа се разузнавачки податоци кои ги имаме не само од ЕУ, туку и од НАТО. Артилерија повеќе не е достапна за РС. Исто така, има и присуство на меѓународни сили. Знам дека се намалени, но имаме гаранции од генералите дека можат да донесат до 6.000 војници во рок од 24 часа до седум дена од првиот момент, рече Вајц.
Вајц и Франц викендот престојуваа во земјава со цел да ја смират политичката криза. За денеска се планирани средби со членови на трипартитното претседателство на БиХ, како и со пратеници.