Нека биде како пред две години. Ова е желба и помисла што ги обединува ракометарите на Вардар во пресрет на денешното полуфинале против Барселона на Фајналфор турнирот во Лигата на шампиони во Келн. Мечот во „Ланксес арена“ е закажан во 18 часот и ќе биде претпоследен за овој состав на европскиот првак од 2017 година. Затоа „црвено-црните“ најавуваат дека ќе покажат карактер и ќе остават срце на терен во обид да играат ново финале пред најавената летна разделба.
„И тогаш и сега нè гледаат како аутсајдери, и тогаш и сега дојдовме во Келн без притисок, и тогаш и сега за ривал ја имаме Барселона. Ќе дадеме максимум и ќе се вложиме до последен атом да играме финале“, се пораките што ги емитуваат сите вардарци под команда на Роберто Гарсија Парондо во моментот во Германија.
Македонската ракометна гордост викендот по третпат ќе игра на завршница во Лигата на шампиони. Првата, во 2017 година, беше неочекувано еуфорична. Вардарци најпрво ги шокираа Каталонците во полуфиналето, а потоа и ПСЖ во финалето за враќање во Скопје со престижниот пехар и голема забава на плоштадот „Македонија“.
Од аспект на перцепција на големата четворка во Лигата на шампиони, вардарци се наоѓаат во слична ситуација и овојпат. Но, од аспект на внатрешните случувања во клубот во оваа сезона, сликата е неспоредливо различна. Стручниот штаб се соочува со проблеми околу повредени играчи, во меѓувреме заминаа неколкумина од ростерот со кој беше освоен трофејот пред две години и како капак доаѓа беспарицата и неколкуте плати што ги должи управата на клубот. Но, она што е исто како во 2017 година се мотивите што не се опаднати ниту сантиметар. Се е оставено настрана и фокусот е само на Келн и дуелот со Барселона чии ракометари триумфираа над вардаровите во двете соочувања во групната фаза во оваа сезона.
„Минатата година дојдовме во Келн како бранители на тронот и во освојувачка мисија. Бевме под притисок и тоа го направи своето. Овојпат ме потсетува на 2017 година. Тогаш дојдовме да замрсиме сметки на сите како и сега. Во ситуација сме да нема што да загубиме. Многупати низ сезоната се вадевме во мечеви, покажувавме и карактер и срце и максимално сме мотивирани да ја победиме Барселона. Ќе сториме се така и да биде“, нагласи Игор Карачиќ.
Патот на Вардар до Келн водеше преку освоеното трето место во групата А, а потоа и низ два двомеча во осминафиналето и четврт-финалето против ППД Загреб, односно, ПИК Сегед.
Во првото полуфинале на завршниот турнир во ЛШ ќе играат Кјелце и Веспрем на Дејан Манасков од 15.15 часот, термин во кој утре ќе се одигра мечот за третото место. Големото финале е утре попладне од 18 часот.