Директорот на американското Федерално биро за истраги (ФБИ) Кристофер Реј изјави дека Русија продолжува да поттикнува раздор во САД, преку ширење лажни вести, пропаганда и тајни операции.

Реј оцени дека Русија се мешала во американските претседателски избори во 2016 година, велејќи дека тоа е заеднички став на „разузнавачката заедница“ на САД.

Претседателот Доналд Трамп, по неговиот самит со рускиот претседател Владимир Путин во Хелсинки, изјави дека „не гледа причина зошто Русија би се мешала во изборите“, но потоа ја корегираше изјавата, велејќи дека сакал да каже дека „не гледа причина зошто Русија не би се мешала“.

ФБИ е во центарот на политичката контроверза во САД, откако Трамп обвини неколку високи офицери во службата дека поради политичка пристрасност ги саботирале истрагите против Хилари Клинтон, а отпочнувале истраги против неговата кампања, користејќи ги обвинувањата за негови врски со Русија како изговор да ги шпионираат соработниците на Трамп.

За Трамп лично Путин е одговорен

Американскиот претседател Доналд Трамп во интервју за „Си-Би-Ес вечерни вести“ изјави дека е точно дека Русија се мешала во американските претседателски избори во 2016 година и потврдно одговори на прашањето дали смета дека рускиот претседател Владимир Путин е лично одговорен за тоа.

Водителот Џеф Глор прво го потсети Трамп дека шефот на Белата куќа претходно изјави оти се согласува со оценката на разузнавачките служби на САД дека Русија се мешала во изборите во 2016 година.

– Па да и тоа веќе го кажав, Џеф. Го кажав тоа многу пати и би рекол дека тоа е точно, па да, рече Трамп.

Водителот инсистираше дека Трамп не го осудил лично Путин за тоа и праша „дали го смета (Путин) лично одговорен“.

– Па, јас би го сметал, затоа што тој е на чело на земјата. Како што себеси се сметам одговорен за работи кои се случуваат во нашата земја. Така што како лидер на земја секако би го сметал за одговорен, да, рече американскиот претседател.

Глор потоа праша што му порачал Трамп на Путин по тоа прашање за време на нивниот состанок во Хелсинки.

– Многу силно за фактот дека не можеме да имаме мешање, не можеме да имаме било што такво – но имај го и ова предвид. Ние исто така живееме во свет на возрасни…Јас му порачав дека не може така, дека такво нешто нема да има повеќе и така ќе мора да биде, рече Трамп.