Работнички ремизира против Шкендија (2:2) во дербито на 34. коло во фудбалското првенство на Македонија за потврда на ново европско лето. Во прилог на дебармаалци беше и триумфот на Вардар над Ренова со 2:0 со што екипата од Џепчиште отпадна од игра за третото место на табелата што води во квалификациите за Лига Европа.
Кире Маркоски во седмата минута и Иван Вуковиќ во 41. реализираа за составот од Градски парк, Марјан Радески беше двоен стрелец за тетовци во 74 минута и во 88. Во меѓувреме Дамјан Шишковски го прочита Ферхан Хасани од белата точка во 68 минута.
Двата гола, пак, за старо-новиот првак беа дела на Барсегјан во 54 минута и на Џонатан Балотели во 64.
Силекс и Пелистер одиграа 3:3 во меч без резултатско значење за европска виза, но гостувањето на битолчани во Кратово долго ќе го памети Баже Илијоски. Напаѓачот на „зелените“ се промовира во нов најдобар стрелец во историјата на домашните шампионати. Погодокот што го постигна во 65 минута е негов 126. првенствен на македонските фудбалски тревници со кој го надмина досегашниот рекордер Зоран Бошковски.
Единственото отворено прашање за последните две кола се однесува на седмата позиција со која се избегнува бараж за опстанок во прволигашката конкуренција. Поблиску до неа во моментот е Победа која има два бода повеќе од Шкупи. Прилепчани како домаќини ја совладаа Македонија Ѓ.П. со 4:2, а чаирчани на својот мегдан ја поразија Брегалница со 3:0.
Се друго е познато во Првата македонска фудбалска лига (ПМФЛ) за оваа сезона. Вардар ја одбрани титулата и ќе игра во квалификациите за Лигата на шампиони. Шкендија, како второпласирана, Работнички како трет на табелата и Пелистер како освојувач на Купот на Македонија ќе настапат во квалификациите за Лига Европа.
Прва лига – 34 коло
Вардар – Ренова 2:0
Шкендија – Работнички 2:2
Силекс – Пелистер 3:3
Победа – Македонија Ѓ.П. 4:2
Шкупи – Брегалница 3:0
Табела: Вардар 79, Шкендија 66, Работнички 54, Пелистер 52, Ренова 48, Силекс 43, Победа 38, Шкупи 36, Брегалница 21, Македонија Ѓ.П. 19.
Идно коло (28 мај): Пелистер – Вардар, Ренова – Шкендија, Работнички – Победа, Силекс – Шкупи, Македонија Ѓ.П. – Брегалница.