Претпоследното коло во првата македонска фудбалска лига ја расчисти последната дилема во сезоната. Победа останува дел од елитната конкуренција по гостинската победа против Работнички со 3:0, а опстанок низ бараж ќе брка Шкупи, откако Силекс ги совлада чаирчани со 1:0. Стрелци за прилепчани на стадионот „Борис Трајковски“ во Маџари беа Гешоски во 15 минута, Станиќ во 60. и Шаркоски во 84, единствениот за кратовци беше дело на Недељковиќ во 77.
Вардар, кој пред неколку кола ја осигура новата шампионска титула, го совлада Пелистер во Битола со 3:2. Николов во 31 минута, Петковски во 35. и Фелипе во 85. погодија за радост на црвено-црните „Под Тумбе кафе“, Илијоски од пенал во 77 минута и Бујчевски во 90. реализираа за „зелените“ чии симпатизери го прифатија поразот со оглед дека, се чини, повеќе беа фокусирани на прослава на освоената титула во националниот Куп.
Најефикасните натпревари во најефикасното коло во сезоната се одиграа во Тетово и во Ѓорче Петров и во нив беа постигнати по осум гола. Ренова и Шкендија ремизира (4:4) во градското дерби под Шара. Нухиу во шестата минута од пенал, Селмани во 34., Гафури во 72. и Усеини во 85. ја тресеа противничката мрежа за „гипсарите“, хет-трик за црвено-црните“ забележа Радески (45’+1′, 58′ и 90’+2′), четвртиот гол го запиша Бесарт Ибраими во 15 минута.
Македонија ја совлада Брегалница во судирот на идните второлигаши со 5:3. Хет-трик, пак, тука постигна Јашароски (12′, 57′, 84′), по еднаш во листата на стрелци се додадоа Јакимоски во 26 минута и Хаџија во 88. Темелков во 33, Наумов во 47 и Миовски во 90 минута реализираа за штипјани.
Прва лига, 35 коло
Резултати
Пелистер – Вардар 2:3
Ренова – Шкендија 4:4
Работнички – Победа 0:3
Силекс – Шкупи 1:0
Македонија Ѓ.П. – Брегалница 5:3
Табела: Вардар 82, Шкендија 67, Работнички 54, Пелистер 52, Ренова 49, Силекс 46, Победа 41, Шкупи 36, Македонија Ѓ.П. 22, Брегалница 21.
Идно, последно, коло (31 мај): Вардар – Силекс, Шкендија – Пелистер, Брегалница – Работнички, Ренова – Победа, Шкупи – Македонија Ѓ.П.