Германската канцеларка Ангела Меркел вчера оцени дека спорот меѓу Македонија и Грција за името e досега најблиску до решение, дека треба да биде затворен, но истакна каков било притисок нема да влијае од корист за процесот.

– Спорот меѓу Македонија и Грција треба да биде решен, притисокот во преговорите не е корисен. Имам впечаток дека двете страни по долго време имаат интерес за решавање на спорот. Тоа е добар предуслов, рече Меркел, одговарајќи на новинарско прашање за тоа дали на средбата со Заев се разговарало за спорот со Грција и дали истото прашање било тема на вчерашниот телефонски разговор со Алексис Ципрас.

Таа рече дека е задоволна што има придвижување во преговорите оценивајќи дека во изминатите 10 години решението не било толку блиску, како што е сега и оти би било извонредно доколку двете страни успеат да ги премостат препреките. Канцеларката напомена дека и двете страни се однесуваат одговорно во обновените преговори и оти и Грција и Македонија знаат што можат да дадат за да се постигне компромис.

– Компромисите се секогаш болни, но и неопходни. Тоа е дипломатска уметност и за тоа не треба да се зборува на прес-конференции, туку зад затворени врати. Верувам дека јавните изјави повеќе може да му наштетат, отколку да му користат на процесот, рече германската канцеларка.

Канцеларката Меркел, ден пред вчерашната средба со премиерот Заев во Берлин, телефонски разговарала со грчкиот премиер Алексис Ципрас, меѓу другото и за прашањето за името, потврдија од кабинетот на Ципрас.

Според грчки медиуми, двајцата договориле да се сретнат денеска во Брисел на неформалниот состанок на лидерите на ЕУ.

Премиерот Заев се заблагодари за силната поддршка од Германија за стратешките определби на Македонија за влез во ЕУ и НАТО и посочи дека македонската Влада е решена да ги решава проблемите со соседите и да развива регионална соработка.

– Добивме силна поддршка од германската страна за нашите стратешки определби, влез во ЕУ и НАТО. Нам ни останува да продолжиме со реформите и со решавање на спорот со Грција. Тоа се тешки прашања, но ние ќе најдеме решение, во кое ќе ги вклучиме и опозицијата и претседателот на државата, а ќе се прашаат и граѓаните, рече Заев на прес конференцијата вчера во Берлин.

Меркел се вклучува во спорот: Денеска со Заев, в петок со Ципрас