Германските власти упатија совет до населението да не патува никаде за божиќните празници додека земјата се бори со ширењето на епидемијата на коронавирус. Во меѓувреме, канцеларката во заминување Ангела Меркел вчера, во едно од можеби последните обраќања до нацијата пред да поднесе оставка, им порача на граѓаните да се вакцинираат.
Вакцинирајте се, земете бустер доза, вакцинацијата помага, рече таа.
Последните мерки во Германија се однесуваат на невакцинирани лица кои нема да можат да влезат во несуштински продавници и ресторани или да присуствуваат на спортски и културни настани. Постои можност парламентот да почне да размислува за воведување на задолжителна вакцинација.
Во Германија се вакцинирани околу 68,9 отсто од популацијата, додека владата се надева дека ќе го зголеми тој процент на 75 проценти. Во саботата се регистрирани 64.510 нови случаи, а починале 378 лица, со што вкупниот број на починати во Германија се зголеми на 102.946.