Потенцијалните партии во идната германска коалициска влада, Социјалдемократската партија на Германија (СПД), Зелените и Либерално -демократската партија (ФДП), се согласуваат по прашањето за легализација на канабисот.
Со години го одбивав легализирањето на канабисот, но сега како лекар имам поинакво мислење, изјави портпаролот на СПД за здравствени прашања Карл Лотербах, за весникот „Рајнише пост“.
Тој објасни дека во последно време е забележано дека илегалните трговци се повеќе мешаат хероин во канабисот, со што корисниците се навлекуваат на уште полоша зависност.
Со легализација на продажбата на канабис, можно е да се реши проблемот со контаминирана марихуана, рече Лотербах.
Тој се залага во идниот коалициски договор на т.н. семафор-влада меѓу СПД, Зелените и ФДП, кои во моментот преговараат за формирање на влада, да се вклучи и делот поврзан со легализација на продажбата на канабис.
Помалите партии од можната коалиција, Зелените и ФДП, исто така се за контролирана и легална продажба на канабис, додека СПД се залага за „регулирана дистрибуција“ како дел од пробните превентивни проекти.
Претседателот на германскиот полициски синдикат, Рајнер Венд ги критикуваше плановите на можната идна влада и рече дека канабисот е дрога што, особено кај младите, води до здравствени проблеми и социјални конфликти.