Холандија денеска почна да транспортира пациенти со ковид-19 во Германија, со цел да го ублажи притисокот врз своите болници кои се борат со порастот на нови случаи.
Според холандските здравствени власти, еден од пациентите со коронавирус утрово бил префрлен со брза помош од Ротердам во болницата во Бохум, а останатите ќе бидат пренесени во текот на денот, пренесува „Ројтерс“.
Бројот на пациенти со коронавирус во холандските болници достигна највисоко ниво во последните недели, а се очекува дека бројот на новозаразени ќе продолжи да се зголемува.
Германските болници понудија вкупно 20 кревети за пациенти со коронавирус од Холандија. Плановите на холандската влада да воведе дополнителни мерки за спречување на вирусот, според „Ројтерс“, доведоа до три последователни ноќи на протести и немири и над 170 приведени лица во градовите низ целата земја.
Од денеска, 470 од 1.050 кревети за интензивна нега во Холандија се користат за пациенти со коронавирус, а болниците веќе го намалуваат капацитетот за прием на редовни пациенти, вклучително и терапии за рак и операции на срце, за да обезбедат доволно простор за случаите со ковид-19.