Холандското обвинителство побара доживотна казна затвор за четворицата осомничени за соборување на патничкиот авион на „Малезија ерлајнс“ во 2014 година над источна Украина. Рускиот министер за надворешни работи, Сергеј Лавров изјави дека се неприфатливи обидите на холандскиот суд да ја претстави несреќата на летот на патничкиот авион МХ17 како државен проблем, а не како кривично дело.

На крајот од тридневната презентација на доказите, јавниот обвинител Манон Ридербекс побара доживотна казна затвор за тројца Руси и еден Украинец на кои им се суди во отсуство, пренесува агенцијата АП.

Обвинителите во своите завршни зборови рекоа дека руската ракета што собори патнички авион била невнимателно употребена, при што загинале сите 298 патници и членови на екипажот.

Лавров: Неприфатливо е несреќата да се претстави како државен проблем

Неприфатливи се обидите на холандскиот суд да ја прикаже несреќата на летот на патничкиот авион MХ17 на „Mалезија ерлајнс“ во Украина во јули 2014 година како државен проблем, а не како кривично дело, изјави рускиот министер за надворешни работи Сергеј Лавров.

Гледаме обиди да се создаде впечаток дека тоа воопшто не е криминален, туку државен проблем, бидејќи Русија наводно ги водела овие луѓе кои во овој случај се обвинети во Хаг“, рече Лавров во интервју за РТ.

Според него, тоа е апсолутно неприфатливо, пренесува руската агенција ТАС. Тој додава дека Русија внимателно го следи судскиот процес во Хаг и дека ќе го каже својот став веднаш штом ќе биде објавена одлуката на судот.

Всушност, тоа е кривично судење и ние го гледаме како такво. И како што гледам јас, секој непристрасен адвокат на овој начин ќе го разбере овој случај, заклучи рускиот министер за надворешни работи.

Авион на компанијата „Малезија ерлајнс“ со 298 луѓе беше соборен на 17 јули 2014 година додека летал над источна Украина, каде се бореле украинските владини сили и проруските бунтовници.