Најавените рестрикции за невакцинираните лица против ковид-19 не се донесени за поделби во општеството, ниту за стигматизација, истакна портпаролот на грчката Влада, Јанис Иконому во интервју за грчката телевизија „Антена“.
Тој објасни дека целта на Владата е да го заштити општеството, да ги заштити граѓаните и оние кои веќе се вакцинираа и ги почитуваа мерките во изминатиот период.
Ги гледате бројките. Вчера имавме 370-380 луѓе на интензивна нега. 90 отсто од нив се невакцинирани, Експертите велат дека невакцинираниот има 13 пати поголема можност да се разболи и да биде приклучен на апарати. Што треба да направи Владата? – Да седи со скрстени раце?, истакна Иконому.
Додаде дека намерата на Владата е да нема ново затворање на економијата, ниту рестрикции кои „не се одразуваат само на економската и бизнис активност, туку се одразуваат и на психологијата, на начинот на кој секој живее, се движи, размислува“.
„Планот и намерата што во овој момент постојат е да не одиме на целосен локдаун и на општи ограничувања, како оние што ги живеевме во претходниот период. Не е исклучено, онаму каде што ситуацијата станува загрижувачка и ги надминува безбедносните индикатори поставени од научниците, да преземеме конкретни мерки, како што се оние поврзани со ноќната забава, со музиката, евентуално општа употреба на маски, доколку биде потребно. Односно, не говориме за рестриктивни мерки со иста димензија и природа како во претходниот период, рече портпаролот на грчката Влада.