Злосторничко здружување за перење пари формирала партијата ВМРО-ДПМНЕ во периодот од 2009 до 2015 година. Осомничени во случаите „Талир“ – за перење пари и „Траекторија“- за кинеските кредити кои ги објави денеска Специјалното јавно обвинителство е безмалку цел партиски врв.
Во првиот случај „Талир“ осомничени се 11 лица за перење пари од кои 9 лица како директни извршители и 2 како помагачи. Како што кажаа од СЈО осомничен е лидерот на партијата Никола Груевски и сите генерални секретари во партијата од 2009 до 2015 година, а тоа се техничкиот премиер Емил Димитриев, Мартин Протуѓер и Кирил Божиновски.
Осомничени се и директорите на центарот за комуникации на ВМРО-ДПМНЕ. Овој центар долги години го водеше пратеникот Илија Димовски, кој е еден од осомничените во овој случај, а неговата работа во 2015 година ја презема Иво Котевски, помошник министер во Министерството за внатрешни работи и десна рака на екс министерката Гордана Јанкулоска.
Во случајот „Траекторија“ осомничените Груевски, вицепремиерот за економски прашања Владимир Пешевски и ексминистерот за транспорт и врски Миле Јанакиески се сомничат за злоупотреба на службената положба.
Постојат основани сомненија дека во периодот од 2012 и 2013 година осомничените го наместиле тендерот за изградба на автопатите Миладиновци –Штип и Кичево – Охрид.