Македонија се најде на 39 место на листата на земји извознички на фудбалери на Меѓународниот центар за спортски студии (ЦИЕС) со седиште во Нојшател, Швајцарија. Во истражувањето се опфатени 31 национално првенство во УЕФА зоната. Само тројца од нив играат во петте најквалитетни европски лиги (Англија, Шпанија, Италија, Германија, Франција), во случајот сите во Серија А (Горан Пандев, Илија Несторовски, Александар Трајковски).
Словенија со 38 играчи (13 во „Лига 5“) е на делба на 34 место со Колумбија. Едно место над нив е Црна Гора со 39 (двајца во „Лига 5“), БиХ е на 16 позиција со 80 (пет во „Лига 5“), Хрватска е седма со 141 (33 во „Лига 5“), а најголем извозник на фудбалери од државите на поранешна Југославија е Србија, на четвртото место, со 189 од кои 39 во „Лига 5“.
Најголем извозник, пак, на глобално ниво е Бразил. Според податоците на ЦИЕС, во 31 фудбалска лига на стариот континент играат вкупно 469 Бразилци. Зад нив е Французите со 312 играча надвор од нивната Лига 1. Трета е Шпанија со 201 интернационалец, а топ 5 завршува со Аргентина со 168.
Обработен е бројот на странци само во петте најсилни европски лиги (Примера, Премиерлига, Бундеслига, Серија А и Лига 1). Во нив доминираат Французите со 116 фудбалери, Бразилци има 114, Аргентинци се 97 и по 48 Швајцарци и Белгијци.
Најмногу странци (65,4 отсто), пак, има во фудбалскиот шампионат на Кипар. Повеќе од 50 отсто интернационалци играат во Суперлигата на Турција (62 отсто), во англиската Премиерлига (61,8 отсто), во белгиската Жупилие лига (60 отсто), во италијанската Серија А (56,2 отсто), во португалската Примеира (53,5 отсто) и во шкотската Премиерлига (50,5 отсто).
Покрај петте најквалитетни шампионати во Европа во истражувањето се опфатени и првенствата на Словенија, Хрватска, Србија, Австрија, Белгија, Белорусија, Бугарија, Чешка, Данска, Финска, Грција, Холандија, Израел, Кипар, Унгарија, Норвешка, Полска, Португалија, Романија, Русија, Словачка, Шкотска, Шведска, Швајцарија, Турција и Украина.