Вонредни внатрепартиски избори во СДСМ и седница на највисокото партиско тело на ВМРО-ДПМНЕ. Најголемите политички сили во државата утре (12 декември) со обемни активности во чија основа се лидерите – владеачката бира наследник на Зоран Заев кој најави оставка на функциите претседател во партијата и премиер во Владата по поразот на локалните избори.
Во трката за наследник на Заев се пријавија тројца кандидати – Димитар Ковачевски, Фросина Ременски и Јован Деспотовски. Сите членови на партијата кои поседуваат електронска членска картичка ќе можат да го искористат своето право на глас на 194 избирачки места ширум земјата кои ќе бидат отворени од 8 до 19 часот.
Изборите ги спроведува Централна изборна комисија, Општински изборни комисии и Одбори во сите општински ораганизации. Вонредните внатрепартиски избори, нагласуваат од СДСМ, ќе бидат целосно безбедни по здравјето на сите, со почитување на протоколите за заштита од ковид-19.
Опозициската партија, пак, за утре го закажа 17-от Конгрес во СЦ „Јане Сандански“ во Скопје што е најавено дека ќе почне во 10 часот со регистрација на гостите, на делегатите и на претставници на медиумите.
Отворениот дел за јавноста ќе трае до 13 часот по што ќе следи затворен дел. Во рамки на затворениот дел на Конгресот е планирано и гласање и избор на претседател на ВМРО-ДПМНЕ за што единствен кандидат е Христијан Мицкоски кој ќе очекува нов мандат од делегатите.
Конгресот во 17:30 часот ќе продолжи со „второ полувреме“ на отворениот дел за јавноста, во чии рамки ќе има и обраќање на претседателот на ВМРО-ДПМНЕ.
С.Д.