Последните предизборни активности во рамки на кампањата за парламентарните избори во Германија се планирани за денеска и утре, јави ДПА. Двајца од кандидатите за канцелар, социјалдемократот Олаф Шолц и Аналена Баербок од „Зелените“ се упатуваат кон Северна Рајна Вестфалија, најголемата германска провинција и срцето на германската индустрија.
Кандидатот на Христијанско-демократската унија, Армин Лашет е во Баварија, јужна Германија, каде се надева дека сестринската партија на ЦДУ, Христијанско-социјалната унија, ќе победи на изборите.
Последните настани во рамки на оваа кампања и на Шолц и на Лашет се планирани за утре.
Предноста на Лашет над Шолц речиси исчезна за време на кампањата, а сега анкетите покажуваат дека разликата меѓу нив не е повеќе од два или три проценти. Доколку победи Шолц, тоа ќе биде значајна политичка промена во Германија, каде доминираат конзервативците на канцеларката Ангела Меркел речиси 16 години.
Блиските резултати на политичките сили вклучени во трката доведоа до сериозни шпекулации за тоа како би изгледала новата владеачка коалиција. Меркел, која стоеше настрана во поголем дел од кампањата, денеска и утре ќе учествува во кампањата на Армин Лашет, јави ДПА.
Меркел ќе ја извршува функцијата германска канцеларка се додека не се формира нова влада.