Кире Лазаров како ретко кога досега имаше поддршка од соиграчите во напад во натпревар на македонската ракометна репрезентација. Ја доби кога беше најпотребно и најтешко, против Исланд во Рејкјавик за втора победа во групата 3 во квалификациите за ЕП 2020. Натпреварот го заврши како трет стрелец во националниот тим по крилата Дејан Манасков и Гоце Георгиевски. Постигна шест гола и изрази задоволство по добиената голеада на теренот на кој „црвено-жолтите“ никогаш досега немаа победено.
„Ни треба победнички менталитет. Треба да веруваме дека можеме без разлика на противникот. Ова не го зборувам на памет. Имало болни порази, но останав на ставот дека поседуваме квалитет, дека Македонија е ракометна нација и цврсто стојам на тоа“, истакна капитенот на македонската ракометна репрезентација по настапот во Рејкјавик.
Среќен е поради победата, но истовремено навести дека Исланд ќе биде поинаков во реваншот во недела во Скопје. За синоќешниот дуел призна дека се користеле тактички замисли и на Раул Гонзалез оти периодот за подготовки бил краток и дека Брестовац објективно немаше доволно време за подготовки на селекцијата. На мегдан на Исланѓаните се излезе со само два тренинга и нецели два дена подготовки.
„Задоволен сум, секако. Одигравме цврст меч, со памет, и во секој момент знаевме што правиме и што сакаме да направиме. Да бидам искрен, користевме некои финти и од поранешниот селектор Раул Гонзалез, но ова што го велам не е за омаловажување на Данило Брестовац. Напротив. Му честитам за дебито и не сакам да му ја одземам победата. Реално гледано, одработивме само два тренинга и минавме пола ден во пат пред натпреварот. Објективно имавме ден, ден и пол за подготовки“, додаде Лазаров.
Покрај возвратниот дуел со Исланд на домашен терен, Македонија до крајот на квалификациите ја очекува и меч на гости со Турција и на домашен терен против Грција.