Кристофер Стил е поранешен британски разузнавач кој ги обзнанил компромитирачките документи за Доналд Трамп, објави неодамна Вол Стрит Џурнал.

Стил, кој е сега директор на фирма за приватно обезбедување и истраги, го подготвил досието за конекциите на Трамп со Русија. Според документите, новизбраниот претседател соработувал со Кремљ за време на претседателската кампања, но исто така Русите поседувале компромитирачки материјал со кој можат да го контролираат Трамп.

Овие обвинувања, и Москва и Трамп ги одбија веднаш со образложение дека се работи за анти-Трамп структури кои прават политички прогон.

Освен Стил, ко-директор на фирмата Орбис Бизнис Интелеџенс е и Кристофер Бароус, кој пак ниту ги потврдил ниту ги негирал пишувањата на Вол Стрит Џурнал дека Стил е авторот, а фирмата е објавувачот на документите.

А за приказната за дејствувањето на разузнавачите да личи на игра на шпиони доволен е и фактот што Канцеларијата за надворешни работи и Комонвелт, во која работел Бароус, нема коментар за случувањата.

Орбис Бизнис Интелеџенс е фирма основана во 2009 година од поранешни професионалци во британските служби – се вели на официјалниот сајт. Таа во сопствеништво на друга фирма која пак е во косопственост на Стил и Бароус.

Фирмата е со седиште во Лондон во областа Белгравиа, а работи со глобална мрежа на експерти и бизнис лидери кои нудат стратегии и спроведуваат “сложени прекугранични истраги“.

Во досието, за кое се претпоставува дека е напишано помеѓу јуни и декември 2016 година, се содржани непотврдени белешки со обвиненија, кои според разузнавачите, се тешки за потврдување. Но авторот Кристофер Стил важел за разузнавач со одлична репутација во тој свет и бил стациониран во Русија со години.

Сепак за Доналд Трамп овие материјали се лажни. Неговата реакција, десетина дена пред инаугурацијата е остра.

– Тоа се лажни вести. Се е тоа измислено. Не се случило, изјави Трамп на прес-конференција по објавувањето на документите.