Шефот на пратеничката група “Алијанса за иднината на Косово” Пал Љекај изјави дека очекува дека денес околу 13 часот Рамуш Харадинај ќе биде пуштен на слобода.
Поранешниот хашки затвореник и претседател на „Алијансата за иднина на Косово“ беше уапсен вчера во Франција по потерница од Србија.
И додека Косово очекува ослободување на Харадинај, премиерот на Србија Александар Вучиќ на Б92 изјави дека обвинителството има бројни докази против Харадинај и смета дека Франција како “сериозна и правна држава треба да постапи во согласност со правото а не според политички ставови”.
Вучиќ рече исто така дека Србија ќе бара екстрадиција за Харадинај.
“Имаме човек кој е обвинет за толку многу дела што не можете да ги доброите. Никој нема право да ги урива одлуките на незвисното обвинителство”, вели Вучиќ.
Против апсењето на Харадинај денес реагираа и претседателот на Косово Хашим Тачи и претседателот на Парламентот Кадри Весели како и сите политички партии и многу јавни личности.
Српската потерница за Харадинај е распишана во 2006 година со обвинување дека е одговорен за воени злосторства.
Рамуш Харадинај во јуни 2015 година беше уапсен во Словенија, исто така по потерница од Интерпол распишана од Србија. Србија го товари за убиства и тешки злосторства на Косово во текот на 1998 и 1999 година.
Харадинај беше водач на ОВК и поранешен косовски премиер. Хашкиот суд го ослободи од обвиненијата за воени злосторства во 2012 година. Тогаш тој и неговите поранешни помошници Идриз Баљај и Лахи Брахимај беа пуштени на слобода.
Трибуналот изрече ослободителна пресуда по сите точки од обвинението кои се однесуваа на злосторства направени од 1 март до 30 септември 1998 година, во време кога тој беше командир на таканаречената оперативна зона Дукаџин (Метохија). Тоа беше второ ослободување на Харадинај од обвиненијата.
Претходно, по завршувањето на судењето по обвинение за направени злосторства на широкото подрачје на западно Косово, Харадинај и Биљај беа ослободени од сите обвиненија и пуштени на слобода, додека Брахимај беше осуден на шест години затвор.
Во јуни 2015 кога беше уапсен во Словенија, Харадинај по само два дена беше пуштен и му беше вратен пасошот.